“Nardaran işi” üzrə məhkəmə prosesi başlayıb

İyulun 19-da Ağır Cinayətlər Məhkəməsində AXCP sədrinin müavini Fuad Qəhrəmanlı, Müsəlman Birliyi Hərəkatının sədri Tale Bağırzadə və daha 17 nəfərin ittiham olunduğu “Nardaran işi” üzrə məhkəmə prosesi başlayıb.
Prosesdə təqsirləndirilən şəxslərin anket məlumatları elan edilib, vəkili olmayanların dövlət hesabına vəkillə təmin edilməsi təklif olunub. Təqsirləndirilən şəxslər dövlət hesabına vəkildən imtina ediblər. Bildiriblər ki, ibtidai istintaq zamanı həmin vəkillər onları yox, istintaq tərəfi müdafiə edib. Müttəhimlərdən biri isə deyib ki, istintaq zamanı dövlət hesabına verilən vəkilin özü az qala onu döyəcəkdi.
Sonra məhkəmə heyətinə etirazların olub-olmadığı soruşulub. Məhkəmə heyətinə etiraz olmayıb. AXCP sədrinin müavini Fuad Qəhrəmanlı deyib ki, prosesi hansı hakimlərin keçirəcəyinin fərqi yoxdur. “Mənim etirazım rejimədir” deyə Qəhrəmanlı bildirib. F.Qəhrəmanlı xahiş edib ki, məhkəmə mümkün qədər sürətlə aparılsın. Çünki bu istidə Kürdəxanı təcridxanasında qalmaq şəraitsizlik baxımından işgəncəyə bərabərdir.
F. Qəhrəmanlının vəkili Yalçın İmanov hüquqlarını müdafiə etdiyi F. Qəhrəmanlının barmaqlıqlar arasından çıxarılıb, vəkillərinin yanında əyləşməsi haqqında vəsatət qaldırıb. Vəkil F. Qəhrəmanlının günahsız olduğunu və onun barəsində cinayət işinin ayrılıb, istintaq orqanına qaytarılmasını istəyib. Y. İmanov F. Qəhrəmanlı haqqında həbs qəti-imkan tədbirinin dəyişdirilərək, ev dustaqlığı ilə əvəz edilməsini də xahiş edib.
F. Qəhrəmanlı isə vəsatətlərə münasibət bildirərək elan olunan ittihamlarla özünü təqsirli bilməyib.
Müşavirədən sonra məhkəmənin vəsatətləri təmin etmədiyi açıqlanıb.
T. Bağırzadənin vəkili Elçin Sadıqov da hüquqlarını müdafiə etdiyi şəxs barəsində həbs qəti-imkan tədbirinin ev dustaqlığı ilə əvəz olunması haqqında vəsatət qaldırıb.
Prosesdə T. Bağırov da ifadə verərək, özünü təqsirli bilmədiyini deyib.
Təqsirləndirilən Abbas Hüseynovun vəkili Fariz Namazlı isə vəsatət qaldıraraq, A. Hüsenynin ibtidai istintaqa verdiyi ifadələrin sübutlar siyahısından çıxarılmasını istəyib.
Məhkəmə vəsatətləri baxılmamış saxlayıb.
Proses iyulun 22-də davam edəcək.
Qeyd edək ki, T. Bağırov Cinayət Məcəlləsinin 120-ci (qəsdən adam öldürmə) maddəsinin 120.2.1, 120.2.3, 120.2.4, 120.2.7, 120.2.12, 29,120-ci (qəsdən adam öldürməyə cəhd) maddəsinin 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-cü (qanunsuz olaraq odlu silah əldə etmə), 228.4-cü (qanunsuz olaraq silah gəzdirmə) və digər maddələri ilə ittiham olunur. Ötən il noyabrın 26-da hüquq-mühafizə orqanlarının əməkdaşlarının Bakının Nardaran qəsəbəsində keçirdikləri xüsusi əməliyyat zamanı T. Bağırov da daxil olmaqla 60-dan çox şəxs saxlanılıb. Həmin şəxslərdən bir neçəsinin cinayət işi digərlərindən ayrılaraq Sabunçu rayon Məhkəməsinə göndərilib, barələrində müvafiq hökmlər çıxarılıb.
AXCP sədrinin müavini F. Qəhrəmanlı isə ötən il dekabrın 8-də həbs edilib. Məhkəmə onun barəsində 3 ay müddətinə həbs qətimkan tədbiri seçib. O, Cinayət Məcəlləsinin 281 (dövlət əleyhinə açıq çağırışlar), 283-cü ( milli, irqi, sosial və ya dini nifrət və düşmənçiliyin salınması) və 220.2-ci (hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) maddələri ilə ittiham olunur.

 

MƏNBƏazadlıq.info apa.az
Əvvəlki məqaləSalyanda yol qəza hadisəsi baş verib – Yaralılar var
Növbəti məqalədəNiyə məni döyürsünüz?