Qurban Qurbanov: “Cütlüyün favoriti “Viktoriya”dır”

“Viktoriya” tarixi olan klubdur və son illərdə qazandığı uğurlar da göz qabağındadır. Rəqibimiz güclüdür, yaxşı futbolçulara malik komandadır, istənilən halda bu cütlüyün favoriti sayılır”.

Bu sözləri “Qarabağ” klubunun baş məşqçisi Qurban Qurbanov oyun öncəsi açıqlamasında deyib.

Çempionlar Liqasının III təsnifat mərhələsində qarşılaşacaqları “Viktoriya Plzen” haqda danışan Q.Qurbanov komandasını çətin oyun gözlədiyini bildirib:

“Ardıcıl üçüncü ildir ki, bu mərhələdə mübarizə aparırıq. “Viktoriya”nı ötən il Avroliqanın qrup mərhələsində qarşılaşdığımız “Monako”, “Anderlext” və ya “Tottenhem”lə müqayisə etməzdim. Rəqibimiz özünəməxsusluğu ilə seçilir. 2014-cü ildə “Viktoriya” ilə oynadığımız yoxlama oyunundan cəmi 4 futbolçu hazırda komandada çıxış edir. Bizi çətin oyun gözləyir. Komandada baş məşqçi dəyişikliyi olması rəqibin gücünü azaltmır, ötən il də bir neçə tur qalmış çempion olmuşdular. Yeni baş məşqçi ilə belə turnirdə ilk matçlarına çıxacaq, bu baxımdan rəqibin necə oynayacağı gözlənilməzdir. Bu oyuna yaxşı hazırlaşmışıq. İnşallah, xeyirli və uğurlu olan nəticəni qazanmağa çalışacağıq”.

Qeyd edək ki, bu gün “Dusan Arena”da baş tutacaq “Viktoriya” – “Qarabağ” oyunu Bakı vaxtı ilə saat 22:15-də başlayacaq.