Məhkəmədə Xədicə İsmayılovanın Baş Prokurorluqdan kompensasiya iddiasına baxılıb

Bu gün Səbail Rayon Məhkəməsində jurnalist Xədicə İsmayılovanın Bakı Şəhər Prokurorluğuna qarşı iddiası üzrə məhkəmə prosesi davam etdirilib.
Hakim Azər Tağıyevin sədrliyi ilə keçirilən proses zamanı X. İsmayılova Cinayət Məcəlləsinin 125-ci maddəsi ilə həbs edildiyini, lakin sonradan məhkəmə tərəfindən bu maddə üzrə bəraət aldığını əsas gətirərək, həbsinə görə Bakı Şəhər Prokurorluğundan kompensasiya istəyib.
Xədicə İsmayılın vəkili Yalçın İmanov da prosesdə çıxış edib. Vəkil bildirib ki, müdafiə etdiyi şəxs 5 dekabr 2014 il tarixindən 6 mart 2015-ci il tarixinədək qanunsuz olaraq həbsdə olub: “5 dekabr 2014-cü il tarixində Xədicə İsmayıl Cinayət Məcəlləsinin 125-ci (intihar həddinə çatdırma) maddəsi ilə şübhəli bilinərək Səbael rayonu Məhkəməsi tərəfindən barəsində həbs-qətimkan tədbiri seçilib. 91 gün keçəndən sonra ona digər maddələr üzrə ittiham verilib. Bakı Ağır Cinayətlər Məhkəməsinin 1 sentyabr  tarixli hökmünə əsasən, Cinayət Məcəlləsinin 125-ci maddəsi üzrə bəraət hökmü çıxarılıb. Ali Məhkəmədə bu, təsdiqlənərək qanuni qüvvəyə minib. Bu da onun sübutudur ki, Xədicə İsmayıl 91 gün qanunsuz olaraq Cinayət Məcəlləsinin 125-ci maddəsi üzrə həbsdə olub. Bu müddətdə Xədicə İsmayıla həm maddi, həm də mənəvi zərər dəyib. Tutulan zaman Xədicə İsmayıl “Azadlıq” radiosununda çalışıb və aylıq 2 min manat əməkhaqqı alıb. Saxlandığı 91 gün ərzində onun ailəsi yanına taksiylə gedib, mədəsindən əməliyyat olunduğu  üçün ona dietik yeməklər aparılıb. Əlavə olaraq onun hüquqlarını müdafiə edən mən və Fariz Namazlıya ödənişlər edilib. Bunların hamısı ümumi olaraq 9030 manat təşkil edir. Bu, Xədicə xanıma dəyən maddi ziyandı. Biz mənəvi zərər kimi isə 20 min manat tələb qoymuşuq. İddiamızın təmin edilməsini tələb edirik”.
Bakı şəhər Prokurorluğunun nümayəndəsi Günel Əkbərli isə bildirib ki, iddia ərizəsi əsassız olduğundan təmin edilməsin: “5 dekabr 2014-cü ildə onun barəsində cinayət işi başlanıb. Zərərçəkən Tural Mustafayevin istintaqa verdiyi ifadələr və başqa sübutlar olduğundan barəsində həbs-qətimkan tədbiri seçilib. Ona görə də iddia təmin edilməlidir”.
Prosesin gedişində vəkil Yalçın İmanov məhkəməyə sənədlər təqdim edib. O bildirib ki, Xədicə İsmayıl vergi ödəciyisi olub: “Vergilər Nazirliyinə sorğu ilə müraciət etmişik. Sorğumuza cavab olaraq bildiriblər ki, Xədicə İsamyıl 2011-2014-cü illərdə 103 min manat gəlir əldə edib və bundan 4 mini sadələşmiş olaraq vergi verib. Bu Xədicə İsmayılın gəlirlərinin nə qədər olmasından xəbər verir. Biz digər sənədləri də gələn prosesdə təqdim edəcəyik”.
Maliyyə Nazirliyinin nümayəndəsi də çıxışında iddianın təmin edilməməsini istəyib.
Qeyd edək ki, proses sentyabrın 23-də davam etdiriləcək.