Ermənistan hökümətində ixtisarlar: Deputatların da sayı azaldılır

Ermənistan rəsmiləri növbəti il dövlət qurumlarında bir çox ixtisarların olacağını açıqlayıb.
Belə ki, gələn il Ermənistanın dövlət idarəçilik orqanlarında xərclər 2 miyon dollardan da çox azaldılacaq.
Noyabrın 1-də büdcə layihəsinin müzakirəsi zamanı elan edilib ki, bunun təxminən yarısı prezident administrasiyasının payına düşəcək.
Administrasiyasının rəhbəri Armen Gevorkyanın sözlərinə görə, bu əsasən milli təhlükəsizlik şurasında iş yerlərinin ixtisarı hesabına olacaq.
Belə ki, 93 ştatdan hazırda cəmi 27-i qalıb.
“Hələlik prezident aparatında elə bir ixtisar gözlənilmir, amma hər şey ola bilər”, – deyə Gevorkyan çıxışı zamanı bildirib.
Həmçinin növbəti parlamentə xərclərin təxminən 800 min dollardan çox azaldılması nəzərdə tutulur.
Amma bu əməkhaqları, əmlak və xidməti avtomobillərə aid deyil.
Parlament aparatının rəhbəri Hrayr Tovmasyan deyib ki, yeni konstitusiyaya görə gələn il seçiləcək yeni parlamentdə 131 yox, cəmi 101 deputat ola bilər.
O qeyd edib ki, deputatlar beynəlxalq konfranslara büdcə hesabına gedəcəklər, amma bu cəmi 13 beynəlxalq təşkilata aiddir. Məsələn, MDB-nin parlamentlərarası assambleyası, Kollektiv Təhlükəsizlik Müqaviləsi Təşkilatının assambleyası, Avropa Şurası Parlament Assambleyası, ATƏT-in Parlament Assambleyası və s.
Tovmasyan həmçinin deyib ki, parlament gələn il qaz və elektrik enerjisi hesabına da qənaət edəcək.
Xərclərin ixtisarı hökumətdən də yan keçməyəcək.
Nazirlər Kabinetinin aparat rəhbəri David Harutyunian deyir ki, gələn il hökumətdəki 3-cü korpus və xidməti avtomobillərin ləğvi hesabına 370 min dollara qənaət ediləcək.
Ümumilikdə isə hökumət gələn il dövlət xərclərini təxminən 210 milyon dollar azaltmaq fikrindədir.
Baş nazir Karen Karapetyan büdcə layihəsinin müzakirəsində deyib ki, hökumət istəyir ki, gələn il ümumdaxili məhsulun artımı 3,2 faiz olsun, amma bunun üçün xeyli səy göstərmək lazım gələcək.
Yeni büdcə layihəsi noyabrda parlamentin müzakirəsinə çıxarılacaq.