Türkiyədə uşaqlara təcavüz edənlər həbsdən xilas ola biləcəklər [Yeni qanun]

Türkiyə Böyük Millət Məclisində qalmaqallı qanun müzakirəyə çıxarılıb. Hakim partiya tərəfindən təklif edilən qanun cinsi zorakılıqla bağlıdır.
Təklif edilən dəyişikliyə görə uşaqların cinsi istismara məruz qaldığı zaman təcavüz edən uşaqla evlənərsə, ona verilən həbs cəzası təxirə salına və ya ləğv edilə bilər.
Türkiyə mətbuatının məlumatına görə, iqtidardakı AKP-nin dəstəklədiyi dəyişikliyə müxalifət partiyaları etiraz ediblər. Buna baxmayaraq, hakim partiyanın səsi yetərli olub ki, ilkin mərhələdən qanun keçsin.
Ədliyyə naziri Bekir Bozdağ bildirib ki, həbsxanalarda təcavüzdən 3-4 min insan var və bu hallarda ən çox qadınlar zərər çəkirlər. CHP millət vəkili Tuncay Özkan isə AKP-ni təcavüzü normallaşdırmaqda ittiham edib. Digər CHP və MHP millət vəkilləri də oxşar ittihamlar səsləndiriblər.
Təklif Türkiyədə ciddi müzakirələrə səbəb olub. Bundan sonra baş nazir Binali Yıldırım rəhbəri olduğu partiyaya təlimat verib ki, müxalif partiyalarla görüşüb qanuna təklif olunan dəyişikliyi yenidən müzakirə etsinlər.