Jurnalistin təzyiqlərə məruz qaldığı deyilir

Ziya Əsədli
“Azadlıq.info” saytının Biləsuvardakı regional əməkdaşı Ziya Əsədlinin təqiblə üzləşdiyi bildirilir.
Abzas.net xəbər verir ki, bu haqda həmin saytın özü xəbər yayıb.
Xəbərə görə, hələ 2016-cı ilin noyabr ayında Bakıya gələrkən onu Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə apararaq sorğu-sual ediblər.
İndi isə təqiblərin Biləsuvar rayonunda davam etdirildiyi bildirilir.
Z. Əsədli sabiq hərbçidir. Hərbi qulluqda olduğu zaman ümumi qaydada iki otaqlı mənzil alıb: “İndi yerli hakimiyyət orqanları ona qarşı iddia irəli sürürlər. Guya o zaman bu ev veriləndə hansısa qanun pozuntuları olub. Baxmayaraq ki, heç bir qayda və qanun pozuntusundan söhbət gedə bilməz”.- deyə saytın xəbərində qeyd edilir.
Jurnalistin təzyiqlərə məruz qalması ilə bağlı deyilənlərə, hələlik, Daxili İşlər Nazirliyi və yerli hakimiyyət orqanlarından münasibət almaq mümkün olmayıb.