Məhkəmə su sayğaclarının quraşdırılmasının qiymətilə bağlı “Azərsu”dan cavab ala bilməyib

Fevralın 10-da 1 saylı Bakı İnzibati-İqtisad Məhkəməsində Turan İnformasiya Agentliyinin  “Azərsu” ASC dövlət şirkətinə qarşı iddiası üzrə 9-cu məhkəmə iclası keçirilib.

İclasda “Azərsu” ASC-nin sədr müavini Seymur Seyidovun su sayğaclarının quraşdırılması ilə bağlı Turan İnformasiya Agentliyinin 30 avqust 2016-cı  il tarixlu informasiya sorğusuna yazlı cavabı oxunub.

Contact.az xəbər verir ki, cavab informasiya sorğusunun 6 və 7-ci suallarına aid olub:

6. 2016-cı il martın 29-na qədər sayğaclar (mexaniki və smart) hansı qiymətə alınıb?

7. Bir sayğacın quraşdırılması neçəyə başa gəlir və işlərin smetası necədir?

6-cı sualın cavabı belə olub: 2016-cı il martın 29-na kimi alınan sayğacların qiyməti dəyişməyib. Turan agentliyinin direktoru Mehman Əliyevin  “əvvəlki qiymətlə indiki necə dəyişməyə bilər?” sualına “Azərsu”nun nümayəndəsi ağlabatan cavab verə bilməyib. M.Əliyev bildirib ki, qiymətin dəqiq göstərilməsini tələb edib, odur ki, hesab edir ki, “Azərsu” ASC cavabdan yayınır.

7-ci suala da cavab alınmayıb. Cavab kimi sayğacların quraşdırılması üçün istifadə edilən materialların siyahısı təqdim olunub. Qiymətlər və işlərin  smetası göstərilməyib. M.Əliyev bu cavabı da qəbul etməyib.

O, hakim Şərafət Məmmədovanı cavabdehdən informasiya sorğusunda qaldırılan suallara tam, hərtərəfli cavab verməsini tələb etməyə çağırıb.

Sonda hakim 6 və 7-ci suallar üzrə informasiya sorğusundan imtina edilməsi, məhkəmə çəkişməsi zamanı cavabları alınan beş sual üzrə hitam verilməsi barədə qərar çıxarıb. Həmçinin hakim “Azərsu” ASC-nin barəsində xüsusi qərardadın çıxarılmasından və agentliyin təkid etdiyi kimi cərimə tətbiqindən imtina edib.

M.Əliyev bildirib ki, məhkəmənin qərarı ilə razı deyil və rəsmi məhkəmə qərarını aldıqdan sonra Apellyasiya Məhkəməsinə şikayət verəcək.

“Azərsu”dan agentliyin informasiya sorğusuna cavab alınması prosesi beş aydır ki, yubanır. “İnformasiya azadlığı” haqqında qanun cavabdehdən 7 iş günü ərzində cavab verilməsini tələb edir.

Agentliyin sorgusundan öncə məlum olub ki, “Azərsu” sayğacları ölkə prezidentinin 29 mart 2016-cı il tarixli sərəncamı ilə ayrılan vəsait hesabına yüksək qiymətə alır.

Agentlik hesab edir ki, sayğacların və montaj işlərinin qiyməti 5-19 dəfə şişirdilib. Məsələ bundadır ki, ayrılan 12 mln. manatdan 5,5 mln. manatına 50 min sayğac alınıb və daha 6,5 mln. manatın montaj işlərinə sərf edilməsi planlaşdırılıb.

Qeyd etmək lazımdır ki, “Azərsu” 2006-2009-cu illərdə Azərbaycanda sayğacların 100 faiz tətbiqi üzrə üçillik Dövlət Proqramını pozub. Şirkət bildirib ki, 2017-ci il yanvarın 1-dən əhali kateqoriyasından 1342248 abonentə  897350 və ya 66,9% sayğac quraşdırılıb. Qeyri-əhali qrupundan 58775 abonentə 48223 və ya 82 % sayğac quraşdırılıb.

Qəribədir ki, Dövlət Proqramı başa çatdıqdan sonra “Azərsu” sayğacların tətbiqi üçün yeni vəsait almaqda davam edib. Və nəzarət edən dövlət qurumlarının heç biri həmin vəsaitin yumşaq desək, qeyri-rasional istifadə edilməsi ilə maraqlanmayıb.