Mehman Hüseynov: “Möhkəm olun, həbsimə görə sıxıntı çəkməyin”

Bu gün vəkil Elçin Sadıqov Şüvəlan Təcridxanasında siyasi məhbus Mehman Hüseynovla görüşüb.  

Abzas.net xəbər verir ki, bu barədə vəkil açıqlama yayıb. Onun sözlərinə görə, Mehman Hüseynovun əhvalı-ruhiyyəsi yüksəkdir.

Elçin Sadıqov bildirib ki, artıq bloqqeri kameraya yerləşdiriblər. Kamerada 5 nəfərlə qalır: “Yerləri darısqal deyil. Mehman Hüseynov şəraitdən narazılıq etməyib. Kamerada kabinet-sanitar qovşaq, televizor var. Yerli telekanalları izləyə bilir”.

Vəkil deyib ki, siyasi məhbus təcridxanada onunla rəftardan da hər hansı narazılıq bildirməyib: “Bütün dost-tanışa, ondan ötrü narahat olanlara çoxlu salam dedi. Hər kəsin möhkəm olmasını, onun həbsinə görə sıxıntı çəkməmələrini arzulayır”.

Mehman Hüseynov yanvarın 9-da axşam saatlarında saxlanmışdı. Polisin qanuni əmrinə tabe olmamaqda günahlandırılan bloqqer bir gün sonra 200 manat cərimə edilməklə sərbəst buraxılmışdı.

Nəsimi Rayon Məhkəməsinin qərarında bloqqerin 200 manat cərimə edilməsi ilə yanaşı, onun işgəncə ilə bağlı şikayətinin prokurorluqda araşdırılması da öz əksini tapıb.

Yanvarın 11-də M.Hüseynovun vəkili onun bədənində xəsarət yerlərinin və paltarında qan ləkələrinin əks olunduğu fotoları yaymışdı.

Ancaq Daxili İşlər Nazirliyi bloqqerə polisdə işgəncə verilməsi ilə bağlı deyilənləri əsassız sayıb onu məhkəməyə vermişdi.

Martın 3-də Suraxanı rayon məhkəməsi Mehman Hüseynovu CM-nin 147.2-ci maddəsilə təqsirli bilərək 2 il müddətinə azadlıqdan məhrum etmə cəzasına məhkum edib. Bloqqer məhkəmə zalında həbs olunub.