Ən yoxsul cəzaçəkmə müəssisəsi

Məşhur bloger Mehman Hüseynovun 14 saylı islah müəssisəsinə köçürülməsi haqqında xəbər geniş rezonans doğurub.
Hüquq müdafiəçiləri dərhal bu yerin məhbusların saxlanması üçün yararsız olduğunu və cəzaçəkmə müəssisəsinin çoxdan ləğv edilməli olduğunu bəyan ediblər, orada saxlanılan keçmiş məhbuslar isə bu islah müəssisəsini “ölüm düşərgəsi” adlandırıblar.
Bu keçmiş siyasi məhbuslardan biri hazırda Avropada yaşayan Rəsul Mürsəlovdur. O, contact.az-la 14 saylı cəzaçəkmə müəssisəsi ilə bağlı xatirələrini bölüşüb. ““Ağır olmayan cinayətlərdə” ittiham olunan bütün siyasi məhbusları birmənalı olaraq 14 saylı cəzaçəkmə müəssisəsinə köçürürlər, mən orada bir ildən çox qaldım. Cəzaçəkmə müəssisəsi dörd tərəfdən daş karxanası ilə əhatə olunub. Düzən ərazidə cüzi külək olsa, karxananın tozu hər yeri bürüyür. Vəziyyət kifayət qədər ağırdır. Səhər oyandıqda görürsən ki, “barak” ağappaq olub. Gecə küləyi tozu baraka da gətirir. Gündüz güclü külək əsdikdə həyətdə dayanmaq, demək olar ki, mümkün deyil.
Bu cəzaçəkmə müəssisəsinin ikinci ən böyük problemi sudur. 100-dən çox insan üçün nəzərdə tutulmuş barakda cəmi 3-4 kran var. Cəzaçəkmə müəssisəsində su olmamasının səbəblərindən biri rəhbərliyin su kəmərini yaxınlıqda yerləşən daş karxanasına satmasıdır. Su olmaması hamam qiymətinə də təsir edir – 20 qəpik – 0,80 manat. Bundan başqa, üzqırxan təklif edirlər. Beləliklə, tam xidmət paketi (çimmək + üzqırxan + 10 dəqiqə bonus) 1,20 manata başa gəlir. Telefon danışığı və hətta qanunla nəzərdə tutulmuş qohumlarla görüş də ödənişlidir. Bu, məhbusun doğmalarına, ziyarətçilərin sayından asılı olaraq, 5-20 manata başa gəlir. Təhsil Nazirliyi və Penitensiar Xidmətin birgə layihəsi çərçivəsində məhbuslara təhsil xidmətləri göstərilir və bu məqsədlə islah müəssisəsi kompüterlərlə təchiz edilib. Amma təlim üçün nəzərdə tutulmuş kompüterlər 30 dəqiqəsi 1 manata oyun maşınlarına çevrilib. Siyahını sonsuza qədər uzatmaq olar. Hələ cəzaçəkmə müəssisəsinin mağazasında və kafesində məhsulların üçqat qiymətini demirəm. 14 saylı cəzaçəkmə müəssisəsini “ən yoxsul zona” adlandırırlar. Digərlərinin gəlirlərini təsəvvür edin”, deyə R.Mürsəlov qeyd edib.
“İstər hamam olsun, istər bərbər, 14 saylı islah müəssisəsində ödənişli xidmətlər haqqında bəyanatlar tamamilə absurddur”, deyə Azərbaycan Ədliyyə Nazirliyinin Penitensiar Xidmətinin mətbuat xidmətinin rəisi Mehman Sadıqov contact.az-a bildirib.
“Bu gün mən özüm həmin islah müəssisəsində olmuşam və sizi inandırıram ki, su və insanın həyat fəaliyyəti üçün zəruri olan digər məhsullarla bağlı heç bir problem yoxdur. Bu islah müəssisəsi ağır olmayan cinayətlər törədən şəxslər üçün nəzərdə tutulub. Biz bu insanların azadlığa çıxdıqda işlə təmin olunmasında maraqlıyıq. Buna görə biz məhbuslar üçün kompüter və dil kursları təşkil edirik. Kursları bitirdikdən sonra məhbuslar sertifikat alır. Bütün bunlar tamamilə pulsuzdur. Bir daha təkrar edirəm, pul alınması haqqında bütün bəyanatlar yalandır”, deyə M.Sadıqov qeyd edib.
MƏNBƏTuran
Əvvəlki məqaləBu il istehsalatda 10 nəfər ölüb, 24 nəfər xəsarət alıb
Növbəti məqalədəEvi sökülən sakin: “Aldadıblar bizi, indi də evi sökdülər”