İngiltərədə erkən seçki qərarı

İngiltərə parlamentində baş nazir Theresa May-in dünən gündəmə gətirdiyi “erkən seçki” təklifi bu gün səsverməyə qoyulub.

Abzas.net xəbər verir ki, May-in, “Brexit müddətində bizi gücləndirəcək” deyə təklif etdiyi erkən seçkilər 8 iyunda keçiriləcək.

May dünənki açıqlamasında, “Ölkə Avropa Birliyindən çıxma qərarı aldığından bəri İngiltərə qərarlı və güclü liderliyə ehtiyac duymaya başlayıb və mən baş nazir olduğumdan bu yana hökumət bunu təmin edir”, – deyə bildirib.

Ölkənin parlament seçkilərinə ehtiyacı olduğunu söyləyən May, seçkilərin qarşıdakı illərdə sabitlik və təhlükəsizliyi təmin edəcəyini qeyd edib.

İngiltərə İşçi Partiyası və müxalifət lideri Jeremy Corby də, baş nazir May-in seçki qərarını müsbət qarşılayaraq, bu hadisəni insanlara əksəriyyətin mənfəətini güdən hökumət üçün səs vermə imkanı olaraq qiymətləndirib.

Corby verdiyi açıqlamada, “İşçi Partiyası, iqtisadiyyatı yenidən inşa etməyi bacara bilməyən, həyat standartlarını, təhsil və milli səhiyyə sisteminin büdcəsini aşağı salan hökumətə təsirli bir alternativ olmağı təklif edir”, – deyə vurğulayıb.