AI-95 benzini ucuzlaşa bilər, əgər…

Dollar manata nisbətən daha baha olan vaxt artan qiymətlər yüksək olaraq qalır. Halbuki fevral ayından maya kimi dollar 22 qəpik ucuzlaşıb. Sabit yüksək qiymət idxal edilən AI-95 benzininə də aiddir. Bu benzinin qiymətini Tarif Şurası müəyyən etmir və onu bazar tənzimləməlidir.

2016-cı ilin fevralında dollar 1.6362 manat, həmin benzin 90 qəpik olub. Sonra dollar bahalanıb və 2017-ci ilin fevralında 1.92 manata yüksəlib. Bu zaman AI-95 iki dəfə bahalanıb və qiyməti 1.15 manata çatıb. Hökumət bahalaşmanı manatın ucuzlaşması ilə izah edib.

Amma üç aydır dollar 1.70 manata düşüb sabitləşsə də, AI-95 baha olaraq qalır.

Azadlıq Radiosu-nun məlumatına görə, Neft Araşdırmaları Mərkəzinin rəhbəri İlham Şaban bunu iqtisadiyyatda inhisarçılıq ilə izah edir. O vurğulayır ki, manat möhkəmlənsə də, heç bir seqmentdə qiymətlər düşmür.

“İdxal bir neçə korporasiyanın əlində cəmləşib, qiymətləri onlar müəyyən edir. Bu da hökumətin əlində büdcəni doldurma alətinə çevrilib”, – o hesab edir.

İ.Şaban həmçinin, benzin satan şirkətlərin kartel razılaşması olduğunu bildirib. “Yanacaqdoldurma məntəqələri (YDM) müxtəlif şirkətlərə məxsusdur. Amma qiymətlər hamısında eyni vaxtda artıb. Onların arasında 5 qəpik də fərq yoxdur. Bu, nədənsə Antiinhisar Xidmətində şübhə doğurmur”, – deyə o söyləyib.

“Azpetrol” şirkətinin mətbuat katibi Camal Zeynalov bildirib ki, AI-95 benzini uzunmüddətli müqavilə ilə alınıb və o vaxt dollar baha idi. Digər səbəb kimi o, mövsümi amili göstərib. Verilən məlumata görə, yayda “Azpetrol”un benzin aldığı ölkələrdə qiymətlər artır. “Əgər dollar 1.50 manata düşsə, AI-95 ucuzlaşa bilər”, – o bildirib.

İqtisadiyyat Nazirliyinin mətbuat xidməti və Antiinhisar Xidmətindən isə “AI-95 benzininin müxtəlif YDM-lərdə eyni qiymətlərə satılması nədən şübhə doğurmur” sualına cavab almaq mümkün olmayıb.