Ekspert: “Şagirdlər kütləvi şəkildə təhsillərini yarımçıq buraxırlar”

Azərbaycan Respublikası Təhsil Nazirliyi illik hesabatını yayıb. Hesabata əsasən, bu il 11% şagird orta məktəbi bitirməyib. Məsələyə münasibət bildirən Kamran Əsədov deyir ki, bunun bir çox səbəbləri var. 
“Şagirdlər erkən nigah, ailə vəziyyəti və işləmək məcburiyyətində olduqları üçün təhsillərini yarımçıq qoyurlar”
Bu sözləri Abzas.net-ə açıqlamasından təhsil eksperti Kamran Əsədov deyib.
“Son 7-8 il ərzində müqayisə aparsaq görərik ki, orta məktəbi bitirənlərin və ali məktəbə sənəd verənlərin sayında ciddi azalma var. 2010-cu ildə ali məktəbə sənəd verənlərin sayı 110 min nəfər idisə, 2016-cı ildə bu rəqəm 85 minə, 2017-ci ildə isə, 69 minə düşdü. Ali məktəblərə qəbul plan yerlərində 29%-dan çox artım var. 2010-cu ildə ali məktəblərə plan yeri 28 min idi, amma bu rəqəm 2016-cı ildə 37 minə qədər qalxdı” – deyə K.Əsədov bildirib.
Ekspert deyir ki, təəssüflər olsun ki, orta məktəblərdə şagirdlərin 22%-dən çoxu təhsilini yarımçıq qoyub başqa sahələrə yönəlirlər.

“Əsasən azalma 9-cu sinifdə şagirdlərin kütləvi sürətdə təhsillərini yarımçıq qoymasından irəli gəlir. Təhsilin müəyyən pillələrində 7.5% şagird müəyyən səbəblərdən təhsildən yayınır. Bu erkən nigah, ailə vəziyyəti və əmək bazarına üz tutma ilə əlaqədardır. Bu nəticə etibarı ilə sonda orta məktəbi bitirən şagirdlərin sayına ciddi təsir göstərir” – deyə ekspert K.Əsədov bildirib.
Son 7 ildə Azərbaycanda orta məktəbi bitirən məzunların sayı 11% azalıb. Bu barədə Təhsil Nazirliyinin illik hesabatında qeyd olunub. Hesabata görə, ali məktəblərə qəbul balına vakant yerlərin sayı ilə birgə təsir edən başqa bir amil məzun və abituriyentlərin sayıdır.
2010-cu ildən 2015-ci ilə qədər ilbəil məzun və abituriyentlərin sayı azalıb, 2010-cu ildə 97.328 nəfər olan məzun sayı 2014-cü ildə 84.878-ə qədər düşüb. 2015-ci ildə məzun sayı 3.486 nəfər artsa da, 2016-cı ildə bu rəqəm yenidən 1.212 nəfər azalıb.
Hər il abituriyentlərin əsas hissəsini cari ilin məzunları təşkil etdiyi üçün məzunların sayında artıb-azalma abituriyentlərin sayının artıb-azalması şəklində özünü göstərir.
Ümumiyyətlə, 2010-cu illə müqayisədə 2016-cı ildə məzun sayında 11%, abituriyent sayında isə 10% azalma müşahidə edilib.