Gürcüstanda Avropa Məktəbi açılacaq

Gürcüstanda Avropa Məktəbi açılacaq.
APA-nın Gürcüstan bürosunun məlumatına görə, bunu Gürcüstan baş naziri Giorgi Kvirikaşvili Avropa İttifaqının Qonşuluq Siyasəti və Genişlənmə üzrə komissarı Yohannes Hanla görüşdən sonra  keçirilən mətbuat konfransında bildirib.
O qeyd edib ki, Avropa Məktəbi gələn il sentyabr ayından fəaliyyətə başlayacaq və məktəbdə gənclərin yüksək keyfiyyətli təhsili üçün hər cür şərait yaradılacaq.
“Bu məktəb gələcəkdə ölkəmiz üçün ixtisaslı mütəxəssislər hazırlayacaq”, – deyə baş nazir bildirib.
G. Kvirikaşvili “Şərq tərəfdaşlığı” sammitinin Aİ ilə əməkdaşlığın daha da dərinləşməsinə töhfə verəcəyinə ümidvar olduğunu vurğulayıb. O, islahatlar prosesində Avropa İttifaqının dəstəyinin və maliyyə yardımının böyük əhəmiyyət kəsb etdiyini söyləyib.
Y. Han isə Brüsselin yeni təşəbbüslərin həyata keçirilməsi üçün Gürcüstana yardım etməyə hazır olduğunu bildirib.
Görüşdən sonra Gürcüstanın Avropa və Avro-atlantik strukturlara inteqrasiya məsələləri üzrə dövlət naziri Viktor Dolidze ilə Y. Han “Texniki əməkdaşlıq mexanizmi” haqqında müqavilə imzalayıblar.
Assosiasiya sazişinin həyata keçirilməsinə dəstək məqsədi ilə Brüssel Gürcüstana 32 milyon avro yardım ayıracaq.