Qərb diplomatları Əfqan Muxtarlının işi üzrə Gürcüstanda hərəkətə keçiblər

Əfqan Muxtarlı
Azərbaycanlı jurnalist Əfqan Muxtarlının işi üzrə Gürcüstan Daxili İşlər Nazirliyində görüş keçirilib. Bu barədə Gürcüstanın “Rustavi-2” telekanalı məlumat verib.
Daxili işlər naziri müavini Shalva Kutsishvili və Dövlət Təhlükəsizlik Xidmətinin sədr müavinləri Joseb Gogashvili və Aleksandre Tabatadze Gürcüstanda akreditasiya olunmuş diplomatik korpus nümayəndələrinə istintaq və mövcud faktiki vəziyyət barədə açıqlama veriblər.
Görüşdə ABŞ-ın Gürcüstandakı səfiri Ian Kelly, Almaniya, İsveç, Litva, Macarıstan, Yunanıstan, Fransa, Bolqarıstan, Estoniya, Böyük Britaniya, Hollandiya, Slovakiya və digər ölkələrin səfirləri, İtaliya ataşesi Massimo Moson, həmçinin beynəlxalq təşkilatların nümayəndələri iştirak edib.
Jurnalist Ə.Muxtarlı mayın 29-u oturum icazəsi olduğu Gürcüstandan zorla Azərbaycana gətirilib. Azərbaycan tərəfi jurnalistə Cinayət Məcəlləsinin 315.2, 318.1, 206.1 maddələri ilə ittiham irəli sürüb. Məhkəmənin qərarı ilə ona ilkin istintaq dövründə 3 aylıq həbs cəzası verilib.