Vurğun Əyyub: “Nazirliyin səriştəsizliyi sayəsində təhsilimiz 1 milyon 488 min avro itirdi”

“Başa düşürəm ki, hökumət hər hansısa siyasi təşkilatlara, QHT-lərə ayrılan qrantları qəbul edəndə ehtiyyat edir, ancaq burda təhsilin inkişafından söhbət gedir və heç bir təhlükəsi yoxdur”
Bu sözləri Abzas.net-ə açıqlamasında Xəzər Universitetinin dosenti, Azərbaycan dili və Ədəbiyyat departamentinin müdiri Vurğun Əyyub deyib.
Xəzər Universitetinə ayrılan qrantın Ədliyyə Nazirliyi tərəfindən qeydiyyata alınmamasına münasibət bildirən ekspert deyir ki, bu təhsilin inkişafı üçündür.
“Mən anlamıram, qarşılığında heç bir şey istənilməyən, öhdəlik verilməyən, ancaq təhsilin inkişafı üçün ayrılmış qrantı niyə qeydiyyata almasınlar ki?! Ümumiyyətlə, universitetlər gəlirlərinin bir hissəsini layihələrdən qazanırlar. Elə Xəzər Universitetinin özü də bir neçə dəfə Təhsil Nazirliyindən qrant qazanıb. İndi bu qrant niyə qəbul edilməsin, heç cür anlamıram” – deyə Vurğun Əyyub bildirib.
Vurğun Əyyub bir neçə gün əvvəl məlumat yayaraq Xəzər Universitetinə qazandığı qrantın Ədliyyə Nazirliyi tərəfindən qeydiyyata alınmamasını qınayıb.
Xəzər Universiteti
Keçmiş TQDK sədri bildirib ki, Xəzər Universiteti Avropa Komissiyasının elan etdiyi 1 milyon 488 min avro həcmində təhsilə dair 2 qrant layihəsi udmuşdu. Lakin Azərbaycan Ədliyyə Nazirliyi tərəfindən qeydiyyata alınmadığından həmin vəsait geri çağırıldı. 579 min avro dəyərində layihə Gürcüstanın Akaki Tsereteli universitetinə, 909 min avro həcmində o birisi layihə isə İspaniyanın bir universitetinə verildi.
“Beləliklə, Ədliyyə Nazirliyimizin “gözüaçıqlığı” sayəsində Azərbaycan təhsili 1 milyon 488 min avro həcmində vəsaiti əlindən uçdu. Ədliyyə Nazirliyinin səriştəsiz, qərəzli və burnundan uzağı görməyən qərarları nəticəsində təhsilimiz üçün vacib olan bu qədər vəsait itirilmişdir! Tanrı ağıl versin!”