Norveç yığmasının baş məşqçisi: “Azərbaycan millisi çox yaxşı komandadır”

NICE, FRANCE - JUNE 26: In this handout image provided by UEFA, Coach of Iceland Lars Lagerback faces the media during the Iceland press conference at Allianz Riviera Stadium on June 26, 2016 in Nice, France. (Photo by Handout/UEFA via Getty Images)

Norveç milli komandasının baş məşqçisi Lars Lagerbek Azərbaycan yığması ilə 2018-ci il dünya çempionatının seçmə qrup matçından əvvəl mətbuat konfransı keçirib. 

“Report”un Norveçə ezam olunmuş müxbirinin verdiyi məlumata görə, isveçli mütəxəssis əvvəlcə görüş barədə fikirlərini bölüşüb…

– Oyuna hazırıq. Son oyunda müdafiədə yaxşı təsir bağışladıq. Hücum etməyə də çalışacağıq. Azərbaycan millisi də çox yaxşı komandadır. Bu səbəbdən maraqlı futbol alınacağına ümidvaram.

– Heyətdə hər hansı problem var?

– Heç kim ciddi zədəli deyil. Hamı futbol oynaya biləcək və matça hazırdır.

– Yəqin ki, Bakıdakı ilk oyunu izləmisiniz. Sizcə, Norveç millisi niyə uduzdu və komandanızda nə çatmadı?

– Əlbəttə, televiziya vasitəsilə baxdıq. Hansısa nəticə çıxarmaq çətindir. Oyun elə alındı ki, Azərbaycan güclü oldu. Biz də matça hazırlaşacağıq və ümidvaram ki, qalib gələcəyik.

– Oyuna necə hazırlaşmısınız?

– Komandamız yaxşı hazırlaşıb. Xüsusən müdafiəyə diqqət ayırmışıq. Çünki son iki oyunda problemlər var idi. Azərbaycan millisi də müdafiədə ciddi təsir bağışlayır. Hələ hansı oyun üslubuna üstünlük verəcəyimizi deyə bilmərəm.

– Aleksandr Sorlot son zamanlar yaxşı təsir bağışlayır. Ona sabahkı oyunda şans verəcəksiniz?

– Yaxşı formadadır. İkinci mərtəbədə yaxşı oynayır. İnanırıq ki, bu dəfə də ümidlərimizi doğruldacaq.

– İki hücumçudan necə yararlanmaq niyyətindəsiniz?

– Onları birgə istifadə etmək çətindir. Yarımmüdafiə ilə əlaqələrindən də çox şey asılıdır. Çalışacağıq ki, onlardan səmərəli yararlanaq.

– Hansı cinah oyunçularından yararlanmaq niyyətindəsiniz?

– Ardıcıl iki oyun keçirəcəyik. Hamısından tam həcmdə hər iki qarşılaşmada yararlanmaq lazımdır. İlk matçda hücumda yaradıcı oyun sərgiləyənlərdən, ikincidə isə müdafiəyə kömək edənlərdən istifadə edəcəyik.