Vəkil: “Bədənində iki güllə qalıb, onları niyə çıxarmırlar?”

Martın 1-də Ali Məhkəmədə “Müsəlman Birliyi” Hərəkatının həbsdə olan sədri Taleh Bağırov, Azərbaycan Xalq Cəbhəsi Partiyasının (AXCP) sədr müavini Fuad Qəhrəmanlı və digər 16 nəfərin məhkəmə qərarından verilən kassasiya şikayətinə baxılıb.

Abzas.net xəbər verir ki, məhkəmə hakim Şahin Yusifovun sədrliyi ilə keçirilib.

Məhəkəmədə iştirak edən Abbas Hüseynov və Abbas Quliyevdən əlavə Şamil Abduləliyev də iştirak etmk istəməsi barədə ərizə göndərsə də, sonrada səhhətində yaranməş problemlər üzündən məhkəməyə gələ bilməyib.

Buna münasibət bildirən vəkil Nemət Kərimli onun bədənində 2 güllənin qaldığını bildirib:

“Şamilin bədənindən niyə güllələri çıxarmırlar? Niyə ona belə zülm eləyirlər? Bu tipli hallara faşizm əsirliyində rast gəlinib”.

Daha sonra Abbas Hüseynov çıxış edib. O bildirib ki, Nardaran hadisələri zamanı həbs olunanlar günahsızdırlar və hakimiyyətin sifarişi əsasında həbs olunublar.

Sonda iclasda qərar elan olunub. Ali Məhkəmə kassasiya şikayətini təmin etməyib.

Xatırlatma

2015-ci il noyabrın 26-da Bakının Nardaran qəsəbəsində güc strukturaları tərəfindən xüsusi əməliyyat keçirib. Əməliyyat zamanı iki polis əməkdaşı və daha dörd nəfər həlak olub.

Eyni tarixdə “Müsəlman Birliyi” Hərəkatının sədri Taleh Bağırov və onun bir qrup tərəfdarı həbs edilib. Sonradan güc strukturları ümumilikdə 70 nəfərin həbs edildiyini bildirib. Hüquq müdafiəçiləri isə bu rəqəmin 87 olduğunu iddia edirlər.

Saxlanılanların bir hissəsi qanunsuz silah saxlama və iğtişaş salmaqda ittiham olunaraq, 1 il 6 aydan 6 il 6 ay müddətinə kimi azadlıqdan məhrum ediliblər.

40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib. Onların işi üç qrupa ayrılıb və Bakı Ağır Cinayətlər Məhkəməsində baxılıb.

Ağır cinayətlərdə ittiham olunan T.Bağırov və daha 17 nəfərin məhkəməsi yekunlaşıb. T.Bağırov və müavini Abbas Hüseynov 20 il, Cabbar Cabbarov 19, Rasim Cəbrayılov 17 həbs alıb. Saxlanarkən yetkinlik yaşına çatmamış Ramin Yarıyev 10 il, qalan 12 nəfərin hər biri isə 14 il 6 ay müddətinə azadlıqdan məhrum ediliblər.

Nardaran hadisələri ilə bağlı “Facebook” səhifəsində qanunsuz çağırışlar etməkdə ittiham olunaraq həbs olunan AXCP sədrinin müavini Fuad Qəhrəmanlı 10 il həbs alıb.

Şərti adı “Nardaran işi-3” olan prosesdə də təqsirləndirilənlərə hökm oxunub.

Bakı Ağır Cinayətlər Məhkəməsində Zeynal Ağayevin sədrlik etdiyi, Səbuhi Hüseynov və Azad Məcidovdan ibarət hakimlər kollegiyasının hökmü ilə 12 nəfərə ümumilikdə 160 il 9 ay həbs cəzası verilib. Ayrı-ayrılıqda Zülfüqar Mikayılov 17 il, Elman Ağayev 13 il, M.Quliyev 13 il, M.Məmmədov 12 il 3 ay, E.Bünyadov 12 il 3 ay, E.Ağayev 13 il, E.Həsənov 12 il 3 ay, F.Allahverdiyev 13 il, R.Seyfullayev 13 il, M.İbrahimov 13 il, R.İsmayılov 15 il, C.Əliyev 14 il müddətinə azadlıqdan məhrum edilib.

Dekabrın 28-də daha 12 nəfərə hökm oxunub. “Müsəlman Birliyi” Hərəkatının sədr müavini Elçin Qasımov və Ağaəli Yəhyayevin hər birinə 15 il, ilahiyyatçı Nahid Qəhrəmanova 13 il, ilahiyyatçı İsa İbrahimov, Fərhad Muradov, Elgün Axundov, Vüsal Alış, Seyfəddin Şirvanovun hər birinə 12 il 6 ay, Əli Şahbazov, Seymur Aslanov, Ramil Əliyev və Əmirəli Əliyevə isə 12 il 3 ay həbs cəzası kəsilib.

“Nardaran məhbusları” məhkəmədə, tutularkən və ondan sonra Baş Mütəşəkkil Cinayətkarlıqla Mübarizə İdarəsində ağır işgəncələrə məruz qaldıqlarını deyiblər. Ancaq idarənin əməkdaşları məhkəmədə dindirilərkən işgəncə iddialarını təkzib ediblər.