Fuad Qəhrəmanlının qızına hücum edən hökümətyönümlü fəal saxlanılıb

Dünən AXCP sədrinin müavini Fuad Qəhrəmanlının qızına hücum edən Tural Qarayev bu gün polis tərəfindən saxlanılıb.

Bu barədə Daxili İşlər Nazirliyinin mətbuat xidmətinin rəhbəri Orxan Mansurzadə məlumat verib. Onun sözlərinə görə, Tural Qarayevə qarşı İnzibati Xətalar Məcəlləsinin 510-cu maddəsi ilə (xırda xuliqanlıq) ittiham irəli sürülüb.

Vəkil Elçin Sadıqov isə sosial şəbəkədəki hesabında Tural Qarayeva verilən ittihamı yüngül hesab edib.

Vəkil bildirib ki, xuliqanlıq zor tətbiq etmə və ya zor tətbiq etmə hədəsi ilə müşayət olunduqda əməl bir mənalı olaraq AR CM-nin 221-ci maddəsi (təqsirkar şəxsin ictimai qaydanı kobud surətdəpozan, cəmiyyətə açıqca hörmətsizlik ifadə edən qərəzli hərəkətləri yalnız həmin hərəkətlər vətəndaşlar üzərində zor tətbiq olunması) ilə tövsif olunmalıdır.

Tural Qarayev bu il fevralın 26-da Müsavat Partiyasının üzvləri Xocalı şəhidlərinin xatirəsinə ucaldılmış abidəni ziyarət edərkən, buna əngəl olan polislərin yanında dayanaraq müsavatçıları “BiPi-nin maşaları” adlandırıb.

AXCP sədrinin müavini Fuad Qəhrəmanlının 14 yaşlı qızı Sənay Qəhrəmanlı YAP fəalının hücumuna məruz qalıb.

Aprelin 17-də YAP-ın Suraxanı rayon təşkilatının üzvü Tural Qarayevin AXCP sədrinin müavini Fuad Qəhrəmanlının 14 yaşlı qızı Sanay Yağmura hücum edib.

Sanay Yağmurun sosial şəbəkələrdə yaydığı məlumata görə, Tural Qarayev onu təhqir edib və ona qarşı fiziki güc işlədib.

Zərərçəkənin anası, yazıçı Zümrüd Yağmurun Meydan TV-yə verdiyi məlumata görə, hazırda Sanay Yağmur Yasamal Rayon Polis İdarəsinin 28-ci bölməsində izahat verir.

Zümrüd Yağmurun sözlərinə görə, Tural Qarayevin özbaşınalığı ilə bağlı hüquq-mühafizə orqanlarına müraciət hazırlayıb, eyni zamanda vəkillə məsləhətləşmələr aparır.

Anası deyir ki, Tural Qarayev qızı Sanay Yağmuru aprelin 16-da da izləyirmiş:

“Dünən Tural Qarayev Sanayı dərsdən çıxanda izləyirmiş, sonra uşaq dükanların birinə girib onu itirmək istəyib. Amma bir az sonra dükandan çıxıb yolu keçərkən boz rəngdə avtomobil onun qarşısında dayanıb, yaxşı ki, Sanay tez ordan uzaqlaşıb. Doğrusu, intihar edən 8-ci sinif şagirdi Elina Hacıyeva ilə bağlı paylaşımı üzündən Sanaya təhdid vardı, amma bu dərəcədə olacağına inanmırdım. Aprelin 16-da Sanayın izlənməsini də ictimailəşdirmədim, çünki bu həddə davam edəcəyi ağlıma gəlməzdi”.

Z.Yağmur bildirib ki, bugünkü hadisə metronun “Elmlər Akademiyası” tərəfdə, saat 17 radələrində olub. Həmin vaxt yeniyetmə ingilis dili kursundan çıxıb, yanında rəfiqəsi olub, səkini keçəndə Tural Qarayev hücum edib, əvvəlcə söyüb, sonra vurub:

“Tural Qarayev uşağa hədə-qorxu gələrkən prezident İlham Əliyevin və xanımı Mehriban Əliyevanın adını çəkib, onlardan üzr istəməsini tələb edirdi. Tural Qarayev eyni zamanda Elina Hacıyevanın adını çəkib uşağı hədələyib ki, niyə “event” təşkil edibsiniz?!”