Gəncə məhbuslarının yaxınları Milli Məclisin önündə mitinq keçirib

Gəncə məhbuslarının yaxınlarının Milli Məclisin önündə mitinqi.

Ona yaxın qadın – “Gəncə məhbuslarının” yaxınları mayın 4-də əllərində məhbusların fotoşəkiləri ilə Milli Məclis binasının qarşısına gəliblər.

Onlar “Gəncə məhbuslarına azadlıq tələb edirik!” şüarı səsləndiriblər. Etirazçılar parlament rəhbərliyi və Gəncədən olan deputatlarla görüş tələb ediblər.

“Parlament seçkilərindən əvvəl Gəncədən olan deputat Musa Quliyev deputat seçildikdən sonra övladlarımızın işi üzrə ədalətli qərar qəbul edilməsinə kömək edəcəyinə söz verib. Amma o mandat alan kimi bizi unudub”, deyə aksiya iştirakçılarından biri bildirib.

Polis əməkdaşları qadınları zorla avtobusa mindirərək parlament binasından uzaqlaşdırıblar.

2018-ci il iyulun 3-də Gəncənin o vaxtki icra başçısı Elmar Vəliyevə qarşı sui-qəsd törədilib. Gəncə sakini Yunis Səfəro onu və cangudənini yaralayıb.

Bundan sonra iyulun 10-na Gəncə administrasiyasının binası qarşısında etiraz aksiyası təyin edilib. Həmin gün şəhərdə iğtişaşlar baş verib, iki polis əməkdaşı öldürülüb. Bunun ardınca dindarların və digər şəxslərin kütləvi həbsi başlayıb.

Bu hadisələrlə bağlı 70 nəfərə qarşı cinayət işi açılıb. Təqsirləndirilən şəxslər 6 ildən 18 ilə qədər azadlıqdan məhrum edilib. Təxminən 10 nəfər şərti azadlığa buraxılıb. Səfərovun və daha 11 nəfərin işi üzrə məhkəmə 2020-ci ilin yanvarında başlayıb.

MƏNBƏTuran
Əvvəlki məqaləPaşinyan Rusiyanın Azərbaycan sərhəddindəki iki bazasından danışıb
Növbəti məqalədəMisir Fransadan aldığı 30 ədəd “Rafale” qırıcı təyyarəsinə 3,95 milyard avro ödəyəcək