Avropa Şurası Belarusla da əməkdaşlığı dayandırıb

Avropa Şurası Nazirlər Komitəsi Rusiyanın Ukraynadakı hərbi əməliyyatında oynadığı rola görə Belarus hakimiyyəti ilə əməkdaşlığı dayandırıb.

Bu barədə beynəlxalq təşkilatın mətbuat xidməti məlumat yayıb.

“Təşkilat Belarusun bütün iclas və tədbirlərdə iştirak hüquqlarını dayandırır. Bu, Belarusun Avropa Şurasının, o cümlədən Venesiya Komissiyasının qismən razılaşmalarında iştirakına da aiddir”, – kommünikedə deyilir.

Bundan əvvəl martın 16-dan etibarən Rusiyanın Avropa Şurasında üzvlüyü rəsmi olaraq dayandırılıb.

Ölkənin üçrəngli bayrağı Avropa Şurasının bayraqlar xiyabanından çıxarılıb.

Rusiya 1996-cı ildə Avropa Şurasının üzvü olub. Ukrayna ilə müharibə başlayandan sonra Rusiya Avropa Şurasından və Avropa İnsan Haqları Konvensiyasından çıxdığını bəyan edib. Buna baxmayaraq, rəsmi Moskva AİHM-in qərarlarına Konstitusiyaya zidd olmadığı təqdirdə əməl edəcəyini vəd edib.

Əvvəlki məqalə“Qalatasaray” Avropa Liqasında “Barselona”ya məğlum olub, mübarizəni dayandırıb
Növbəti məqalədəÖzünü Ukraynanın Baş naziri kimi təqdim edən şəxs İngiltərənin müdafiə nazirinə zəng edib