"Pasha Bank" 20 milyon qazanıb

2016-cı ilin birinci yarısında “Pasha Bank”ın 92,7 milyon manat gəlir əldə etdiyi bildirilir. Qazanc 27,6 milyon manat göstərilir.

Turan-ın xəbərinə görə, bank qazancdan 7 milyon manatdan artıq vəsaiti vergilərə ayırıb. Xəbərdə qeyd edilir ki, “Pasha Bank”ın xalis mənfəəti 20,3 milyon manat təşkil edib. Son 12 ayda bankın aktivlərinin artdığı bildirilir.

Xəbərdə qeyd edilir ki, 1 milyard 644 milyonluq aktiv 2 milyon 38 milyon manata yüksəlib. Bankın kredit portfelinin də 644 milyondan 730 milyon manata qalxdığı bildirilir. Cəlb edilən depozitin həcminin də iyulun 1-də 1 milyard 274 milyon manata çatdığı açıqlanır. Depozitlərdəki artım ümumi vəsaitin üçdə biri qədər göstərilir.

“Pasha Bank” 2007-ci ildə yaradılıb. Gürcüstan (“Pasha Georgia”) və Türkiyədə (“Pasha Yatirim Bankası”) törəmə bankları var.  Turanın qeydinə görə, ötən il dekabrın 31-də 3 bankın konsolidə edilmiş aktivləri 1 mlrd manat artaraq 2 mlrd 292 milyon manat təşkil etmişdi.

Turanın xəbərində bankın səhmdarlarının “Pasha Holding” (60 faiz), “Ador” MMC (30 faiz) və Arif Paşayev (10 faiz) olduğu bildirilir. Xəbərdə qeyd edilir ki, bankın son nəzarət subyektləri ölkə başçısının qızları Leyla və Arzu Əliyevalardır.